علي ضياء السكيني
مره أعله جرف البحر
گلت ارسم امنيتي
ورسمت كلشي حلو الليل مابي دمع
وبلايه نار الشمع والغلطه ماتنسمع
من تگرب لبيتي
وشكثر عندي حجي من كثر خوف اليجي
ويفزز المطلوب
الكافر تگله بشنو حته تقنعه ايتوب
واليوگف بمعركة ويشاهد الينكتل
يشبع بروحه ذنوب
وجروح بيه بكثر ضيم الي مر يعقوب
وطبيت ديرة غرم
ونكتل بيها العقل ونكتل بيهه لكلب
ماسلم منهه أحد ثق حته عافيتي
وشكثر جانت صور عل جرف مشموره
بيهه جروح وتعب وهموم منثوره
والنهر لمن يشح شيفيد ناعوره
وبنادم الينجرح مايقتنع بالحجي
لو تقره الف سوره
وبس لا .. اموت بوكت
مايبجي عني أحد حته زواتيتي
الينجرح بعد الجرح الندم شيفيده
والسنبل بعدهو خضر كثرت حواصيده
أبكد ماهملت الدمع الراح ماريده
وليسهر بلاامحب تكثر تجاعيده
واصل الحد مرحله
من رايد أخذ نفس مايوصل لريتي
ثگلان بيه الحزن گد ما حجو عني
وشيفيد ضحك الجذب للراد يعدمني
وشگد أسير الك بس ماأسير مشي الحلم يأخذني
وقربت حته اوصلك وتقربت مني
وابدا انتهاء الحلم وشتدت اللوعة
وأنتهی كل الحجي نهوة الياخذ ثار
كلي شيفيد الخشب لمن تلوحة النار
مريت مرة بضرف لوتدري بيه شصار
حاولت الوح الحلم لاكن جفوفي اكصار
العاشك الينترك لو ينتحر من صدك
لويظل يمشي بدرب خطواته ممنوعة
تجرحني بعد لجرح وتكلهم شلونه
مثل السجين السمع بأجر يعدمونه
الماينطي روحة برخص
ماينطي روحه ابد لومو .. يشنقونه
ليش التحبه وفي يظل الك طول العمر
بس تكسر .. عيونه
ومو كلبي بس منشلع شريانه مشلوعه