ميادة مهنا سليمان
صرخِت بلدي: دخلَك زلزال؟
ولّا صوت فضيحة هَدِّ جبال؟
وين الرّحمة بقلبك قلّي
تاركني بلوعة وقِلّة/ ي
ولغيري بتبعت أموال!
هي النّخوة ال حكيوا عنها
هاد العدل ال قالوا عنّو
وضربوا فيهِ الأمثال:
ناس بلحظة خِسرت رِزقا
وناس بلحظة بتقطف مال
ناس بتغفا فوق سخام
وناس بجاه وشوفة حال
وين النّخوة ال قالوا عِندك
طفلي محاصر تحت الركام
بيكفِّي تحكي وتِتفزلك
إنّك وطني شبِعنا كلام
بلدي بتبخل ترأف فيها
وبالبنك مكدِّس أرقام!
جوع وبرد وما في دفا
جشع وغدر وما في وفا
استغفر ربّك وابقى صلّي
وحدو بيعلم كيف الحال
وحدو شاف الوجع ال فينا
ووحدو الدّايم ونحنا زوال