كرار الصالحي
الشمع طافي ويخاف الليل
خايف من حچي السكته
خايف يشتعل گلبه ويموت ابساع
ما يحلم
وياكل شكو بروحه وينسه سالفته
ومثل حال الشمع صرنه
خطيه احنه
أمس طيفك خنگ صوتي
أمس بين الصور متنه
ونارك تاكل بروحي
وادور للجروح ارماد من جمري
وبليل السهر مشتعل ما اطفه
الهجر نار وخشب عمري
أِنطش العمر اهات
وچف المامش يمرنه
يرسم بالوجه حيره
وتجاعيد وعتب يچفينه ويلمنه
وتريد اهتم وعليش اهتم
يحز بيه الوكت سجين ومثلم
بخور بمگبره وبرية الميتين ماينشم
ومشينه وبس رفيف الشوك
غشمه وماخذينه امتاع
ماندري العتب تابوت
غشتنه الظنون ابساع
وبآگانه الشمس والفي
ومابين السفر والفي
شمس حمرة
وخذتنه للسهر خطار
غفينه والگلب جمره
وگلي شضال من عدنه
كواغد تحترگ بالماي
مابيها رسايل تنقره وتنباس
ولا بيها اليرجعني لحلاة صباي
ولابيها صور عشگي
وتردلي احساس
رسايل تحترگ بالماي مو بالنار
الحچي المكتوب ينگط نار
ولاگيت الحزن ملگه
عزيز وجاي
وشربته عطش روحي
ودمع عيني يصير الماي
ولك چان الظلام بعيني گمريه
النهر شگ زيجه لمن مات شاطيه
شبعد بيه؟
وخذت بيه الظنون تسولف بوهواس
وابد مو مثل الاول باد كل حيلي
كبرت وظلي والحسره تتچيلي
وخلص كلشي
وشباچ الشمس مسدود
وخاويت السهر والكاس
ودخان الجگاره والغنا والعود
مو تدري خلص عمري
گلي شوكت؟
يمته تعود؟