بشار عيدان نايف
أوافي البعض واعـرف مايوافـون
حذر من ضحكة الهزبر والانياب
أمين إعله اليحبني واليكـرهـون
لچن ربعي مكرهـم مكر الاذيـاب
أزرع طيب ل اللَّــه مـو للعيون
چـم فــلاح لـبنادم زرع.. خـاب
تحط روحك بروحه لازم يخـون
تــرد مندوم عالـسويته ماطـاب
نـاگــة صالـح بـدرهه يشربـون
جازوهه بعگـر…(قـدّار و رياب)
مثل جمـرة بجريدة مـايهفتون
لسن عدهم سليطة مالـهه گـراب
شلتهم بالمنـازع فـوگ المتـون
وصلـوا ونكـروني بديـرة أغـراب
الچان بخـزرة مني يطيح ممتون
هسه لسان عنده وكاضلي الـباب
بنطق السين صرت بفـمهم سنون
جـزوني ترهدنـوا نعتـوني جذاب
سبع شواط ركضوا ركض مجنون
عطاشه.ومن معيني إشِربوا سكاب
وسيع بخلگيَ أعبّر جيش فرعون
اليكتم غيضة وكت الغيض ينهاب
صخـر سفـوان يعـرگ. مايعرگون
بـئسًا للرذالـة وبئس الأصلاب
زبـدة بشمس للحـگ مــايثبتـون
ضمايرهم كواغد روجي خنياب
الإبل شالت الدنيا ومالهه گـرون
وابـو گرون يتبختر فارغ أنساب .