فارس الشِباني
الله ربنا…
وكلشي هو ابطوع أمره
الگاع تهتز لحد ما تِبسق بطنها
لحد ما تشخبط ارسوم الثكالى
الفاگده إمن اول أمس ريحة لبنها
والطبيعه إتّذب شكو اخدود إبوجها
إچفوفها إتّعزلهن إباب النِباح
وتنّدفن بأنقاض دولاب الحكومه
الطرمه من حچي الجِراح
والسماء…
السماء ترعد مسافة خوف بوريد الصريفه
الگامت الوادم الغِشمه إعليها من كبرت تشيخ
وادم التسعين واشيوخ الطبيخ
والضريح إيأمن احروز الينز امن الرعيد
والعواصف…
دگت ابيوت…
وسِنينّه ..
ودم رخيص
وموت اكيد
الماي يطفح…
حد سبع گامات طوله إيفيض موت
يغرگ إمن الجوع كلمن
ينطي لإبن العاص صوت
( التسونامي ) اليهد إضفاير الروجه العَتيده
يختنگ من عدها بير
والحرير…
إيگوم يتّلوه معاضد
من يطگ ناعور صَفنّه اباب دكتور الضمير
وابل الامطار يفحط
من يشوف الدوله تسگي الشعب دم
والإشعاع الشمسي ليزر
شَوه إوجوه النِعم
إنّفجار النجمي ( تي ان تي ) ويثور
إعله البگاگيل التريد اتعيش ودور ذمم
والبراكين التّفور إصعد أسواق الفحم
والحمام ابحِجره مذبوح البياض
وفاگد الوان السلام
والنيازك تصطدم بالإزدحام ..
والزغير إيضيع من إچفوف أُمه
إتّلگفه سيطرت الأحزاب
الماله ضابط بالحزب
يآخذ إعدام